Burt með þennan umhverfisráðherra!

Þegar skoðuð eru orð og gjörðir Þórunnar Sveinbjarnardóttur umhverfisráðherra vegna drápsins á ísbjarnarhúninum í dag, þá blasir við svo mikið dugleysi og ráðleysi á alla vegu að ég fæ ekki séð hvernig þessi ráðherra ætlar að sitja áfram og njóta tiltrúar og trausts í embætti.

Þetta er dæmi um þann einstaka bullukollugang sem einkennt hefur ráðslag Samfylkingarráðherra ríkisstjórnarinnar það sem af er þessu kjörtímabili. Reyndar er þetta toppurinn á vitleysunni og er þá mikið sagt.

Það stendur ekki steinn yfir steini í málflutningi Þórunnar. Hún ruglar og bullar um að koma bjarnarins tengist óeðlilegu ástandi í loftlagsmálum og náttúrufari! Ef svo er og hafísinn horfinn - hvernig stendur þá á því að hafísinn er rétt norður af landinu og svo nálægt að ísbjörn gengur hér á land í sumarbyrjun?

Í fréttum lýsti umhverfisráðherra þessu dýri eins og hér væri á ferð ein mesta ófreskja sem menn hefðu augum litið hér á landi. Síðan hefur hún miklað það á alla kanta og vegu hve ómögulegt það hefði verið að fanga dýrið lifandi og koma því aftur til sinna heimkynna á hafísnum sem er rétt norður af landinu. Fjörutíu sjómílur hefur frúin sagt með andköfum í hverju viðtalinu á fætur öðru - eins og hér sé um að ræða óyfirstíganlega fjarlægð.

Þórunn Sveinbjarnardóttir - Fjörutíu sjómílur eru skitnir 75 kílómetrar eða nokkurn veginn vegalengdin milli Reykjavíkur og Borgarness...

Ég gat ekki séð á neinum fréttamyndum dagsins að þessi björn hefði verið ógn við eitt né neitt. Hann var langt uppi í fjalli, langt frá þjóðveginum, óravegu frá byggð. Þegar hann var drepinn sýndist mér á fréttamyndum hann vera að fjarlægjast mannsöfnuðinn og bílaflotann á þjóðveginum.

Það var ekkert óframkvæmanlegt að bjarga bangsa eins og handhafi framkvæmdavaldisns á Íslandi í umhverfismálum heldur fram í von um að blekkja alþjóð. Hvað með það þó bíða þyrfti nokkra klukkutíma eftir svæfingarlyfjum og byssu ef það var slíkt sem skorti? Og þó lyf hefðu ekki verið til í landinu, þá er það nú svo að flugvélar fara á milli tugum saman hvern einasta dag og það hefði nú mátt koma lyfjapakka í hraðsendingu á eina þeirra. Eða hvað?

-----------------------

Svona hefði mátt gera þetta:

1. Það átti að loka fyrir alla umferð almennings og gæta þess að ekki kæmist styggð eða hræðsla að dýrinu sem var alveg rólegt í upphafi.

2. Það átti að vera hægt að leggja út æti og þannig gefa birninum að éta, dópa hann niður og flytja á brott.

3. Ein af þyrlum Gæslunnar hefði getað tekið hann í neti niður á þjóðveginn.

4. Þar hefði mátt bíða með kassa, gám eða öflugt trébúr sem röskir smiðir hefðu sett saman í dag niður á Sauðárkróki.

5. Dýrið flutt á bíl til hafnar á Skagaströnd eða Sauðárkróki.

6. Þar um borð í fiskibát og sigla svo með bjössa norður að hafísröndinni og sleppa honum lausum þar.

-------------------

Var þetta virkilega svona erfitt?

Ef það er rétt sem Þórunn segir að einungis 75 kílómetrar séu í hafísinn þá hefði bangsi getað verið kominn heim aftur á morgun!

Þessi viðburður hefði fengið mikla og jákvæða athygli í fjölmiðlum og orðið frábær auglýsing fyrir land og þjóð á alþjóða vettvangi.

En í staðinn situm við uppi með það að umhverfisráðherrann hefur með dugleysi sínu sett skammarblett á þjóðina. Hvítabjörninn hræðilegi sem reyndist bara vera rúmlega 200 kílóa húnn, var skotinn þvert á reglur, lög og alþjóðasáttmála þar sem hann var að reyna að fjarlægjast mennina sem vildu hann feigan.

Á þessu ber umhverfisráðherra Samfylkingarinnar alla ábyrgð. Málið verður enn ljótara í ljósi þess að hér fer stjórnmálamaður sem gert hefur sérstaklega í því að útmála sig sem boðbera pólitískrar stefnu í umhverfisvernd á vegum stjórnmálaflokks sem situr í ríkisstjórn. Hérna sáum við í verki hið sanna umburðarlyndi og umhyggju ríkisstjórnarinnar fyrir náttúru heimskautasvæðanna sem Ísland er hluti af.

Þórunn Sveinbjarnardóttir hefur opinberað vanhæfni sína og á að mínu mati að segja af sér.

Og hana nú!

------------------

Viðbót klukkan 22:06:

Þetta er komið á youtube.com http://www.youtube.com/watch?v=l_jFgIwbAmk